𐍅𐌰𐍄𐍉

𐍅𐌰𐍄𐌰𐌳𐍂𐌿𐍀𐌹𐌻𐌰 𐌳𐍂𐌹𐌿𐍃𐌰𐌽𐌳𐍃

𐍅𐌰𐍄𐍉 (𐍅𐌰𐌿𐍂𐌳𐌰𐍃𐌹𐌱𐌾𐌰𐌻𐌴𐌹𐌺𐍉 𐌿𐍃 𐌿𐍃𐌲𐌰𐌹𐍂𐌼𐌰𐌽𐌹𐍃𐌺𐌰 *watōr) 𐍆𐌰𐍂𐍅𐌰𐌻𐌰𐌿𐍃, 𐌳𐌰𐌿𐌽𐌹𐌻𐌰𐌿𐍃 𐌰𐌱𐌽𐌾𐌰𐌼𐌹𐌸𐌱𐌿𐌽𐌳𐌾𐍉𐍃 𐌹𐍃𐍄, 𐌱𐌹𐍃𐍄𐍉𐌳𐌾𐌰𐌽𐌳𐍉 𐌰𐍆 𐍅𐌰𐍄𐌰𐌱𐌽𐌾𐌰 𐌾𐌰𐌷 𐍃𐌿𐍂𐌰𐌱𐌽𐌾𐌰 𐌹𐌽 𐌰𐌽𐌰𐌳𐌰𐌹𐌻𐌰𐌹 𐌰𐍆 2:1 (𐍆𐍂𐌰𐌼 𐍂𐌰𐌸𐌾𐍉𐌽 𐌰𐍆 𐍆𐍂𐌿𐌼𐌰𐌹𐌽𐌹𐌸𐍉𐌼). 𐌹𐌽 𐍃𐌺𐌰𐍀𐌰 𐍆𐌻𐍉𐌳𐌿𐌲𐌰𐌼𐌼𐌰 𐌼𐌹𐌸 𐌷𐌴𐌹𐍄𐌰𐌼𐌹𐍄𐌰𐌸𐌿𐌼 𐌼𐌹𐌸 0 °C 𐌾𐌰𐌷 100 °C 𐌿𐌽𐌳𐌰𐍂 𐌸𐍂𐌿𐌺𐌴𐌹𐌽𐌰𐌹 𐌸𐍂𐍉𐌸𐌹𐌻𐌴𐌹𐌺𐌰𐌹 𐌹𐍃𐍄, 𐌾𐌰𐌷 𐍅𐌿𐌻𐌸𐍂𐌰𐌹𐍃 𐌹𐌽 𐌻𐌹𐌱𐌰𐌹𐌽𐌹𐌷𐌻𐌰𐌿𐍄𐌹𐌲𐌰𐍅𐌰𐌿𐍂𐌺𐌾𐌰𐌼 𐌻𐌹𐌱𐌰𐌹𐌽𐌹𐌻𐌴𐌹𐍃𐌹𐌻𐌴𐌹𐌺𐌰𐌹𐌼 𐌹𐍃𐍄. 𐌿𐌽𐌳𐌰𐍂 𐍆𐍂𐌹𐌿𐍃𐌰𐌽𐌳𐌹𐌽 𐍃𐍄𐌹𐌺𐌰 𐌰𐍆 0 °C 𐌹𐌽 𐍆𐌰𐍃𐍄𐌹𐌸𐌰𐍃𐌺𐌰𐍀𐌰 𐌹𐍃𐍄: 𐌴𐌹𐍃; 𐌿𐍆𐌰𐍂 𐍃𐌹𐌿𐌸𐌰𐌽𐌳𐌹𐌽 𐍃𐍄𐌹𐌺𐌰 𐌰𐍆 100 °C 𐌳𐌿 𐍃𐍄𐌰𐌿𐌼𐌰 𐌹𐌽𐌼𐌰𐌹𐌳𐌴𐌹𐌸 (𐌰𐍄 𐌸𐍂𐌿𐌺𐌴𐌹𐌽𐌰𐌹 𐍃𐍄𐌰𐌿𐌼𐌰𐌱𐌰𐌻𐌻𐌿𐌲𐌰𐌹 𐌸𐍂𐍉𐌸𐌹𐌻𐌴𐌹𐌺𐌰𐌹 𐌰𐍆 1 atm).

𐌸𐍂𐌴𐌹𐍃 𐍆𐌹𐌳𐌿𐍂𐌸𐌰𐌽𐍃 𐌿𐍆𐌰𐍂𐍃𐌹𐌿𐌽𐌰𐌹𐍃 𐌸𐌹𐌶𐍉𐍃 𐌰𐌹𐍂𐌸𐍉𐍃 𐌼𐌹𐌸 𐌼𐌰𐌽𐌰𐌲𐌴𐌹𐌽 𐌼𐌹𐌺𐌹𐌻𐌰𐌹 𐌰𐍆 𐍅𐌰𐍄𐌹𐌽 𐌲𐌰𐌸𐌰𐌺𐌹𐌳𐌰 𐌹𐍃𐍄, 𐌽𐌰𐌼𐌽𐌰𐌻𐌴𐌹𐌺𐍉 𐌰𐍆 𐌸𐌰𐌹𐌼 𐌷𐌰𐌱𐌰𐌼. 𐌷𐍂𐍉𐌶𐌴𐌹𐌽𐍃 𐌷𐌰𐌱𐌰𐍅𐌰𐍄𐌹𐌽𐍃 𐌹𐌿𐍀 𐌹𐌽 𐌻𐌿𐍆𐍄𐌿 𐌾𐌰𐌷 𐌰𐍆𐍄𐍂𐌰 𐌳𐌿 𐌳𐌰𐌹𐌻𐌰𐌹 𐌼𐌹𐌺𐌹𐌻𐌰𐌹 𐍅𐌹𐌸𐍂 𐌲𐌰𐍃𐌺𐌰𐍀𐌴𐌹𐌸. 𐌹𐍃𐍄𐌿𐌷 𐌰𐌿𐌺 𐍅𐌿𐌻𐌸𐍂𐌰𐌹𐍃 𐍆𐌰𐌿𐍂 𐌼𐌰𐍂𐌹𐍃𐌰𐌹𐍅𐌹𐌽𐍃, 𐌰𐍈𐍉𐍃, 𐌱𐍂𐍉𐌺𐌰𐌽𐍃, 𐍃𐌺𐌰𐌿𐍂𐌸𐌹𐌽𐍃, 𐌾.𐍃.𐍆.

𐍅𐌰𐍄𐍉 𐌷𐌰𐌿𐌱𐌹𐌳𐌰𐌳𐍂𐌰𐌲𐌺 𐍆𐌰𐌿𐍂 𐌳𐌹𐌿𐌶𐌰 𐌰𐌽𐌰 𐌸𐌹𐌶𐌰𐌹 𐍅𐌰𐌽𐌳𐍂𐌰𐍃𐍄𐌰𐌹𐍂𐌽𐍉𐌽 𐌹𐍃𐍄, 𐌸𐍉𐌴𐌹 𐌹𐍄𐌰 𐍈𐌰𐌶𐌹𐍂𐌿𐌷 𐌱𐌰𐌹𐌽𐌰𐌱𐌰 𐌰𐌹𐌸𐌸𐌰𐌿 𐌿𐌽𐌱𐌰𐌹𐌽𐌰𐌱𐌰 𐌲𐌹𐍄𐌰𐌽𐌳 𐌸𐌰𐌹𐍂𐌷 𐌼𐌰𐍄𐌹𐌽𐍃, 𐌰𐌺𐍂𐌰𐌽𐌰, 𐌲𐍂𐍉𐌽𐌹𐌸𐍉𐍃, 𐌾.𐍃.𐍆.

𐌰𐌱𐌽𐌾𐌰𐌻𐌰𐌹𐍃𐌴𐌹

𐍅𐌰𐍄𐍉 𐌱𐌻𐌴𐍅𐌰𐍄𐌰 𐌹𐌽 𐍃𐌰𐌿𐌹𐌻𐌰

𐍅𐌰𐍄𐍉 𐍆𐌹𐌻𐌿 𐌰𐌹𐌽𐍆𐌰𐌻𐌸𐌰 𐌼𐌹𐌸𐌱𐌿𐌽𐌳𐌹 𐌰𐌱𐌽𐌾𐌰𐌻𐌴𐌹𐍃𐌹𐌻𐌴𐌹𐌺𐌰 𐌹𐍃𐍄. 𐍄𐍅𐍀𐌿𐍃 𐌹𐍃 $\mathrm{H}{\phantom{A}}_2\mathrm{O}$ 𐌹𐍃𐍄. 𐌸𐌰𐍄𐌰 𐌼𐌰𐌹𐌽𐌴𐌹𐌸, 𐌸𐌰𐍄𐌴𐌹 𐍅𐌰𐍄𐌰𐌼𐌹𐌸𐌰𐌹𐌽𐌹𐌸𐌰 𐍄𐍅𐍉𐍃 𐍆𐍂𐌿𐌼𐌰𐌹𐌽𐌹𐌸𐍉𐍃 𐌰𐍆 𐍅𐌰𐍄𐌰𐌱𐌽𐌾𐌰 𐌾𐌰𐌷 𐌰𐌹𐌽𐌰 𐍆𐍂𐌿𐌼𐌰𐌹𐌽𐌹𐌸𐌰 𐌰𐍆 𐍃𐌿𐍂𐌰𐌱𐌽𐌾𐌰 𐌰𐌹𐌷. 𐌷𐌴𐌹𐍄𐌰𐌼𐌹𐍄𐌰𐌸𐍃, 𐌰𐍄 𐌸𐌹𐌶𐌰𐌹𐌴𐌹 𐌴𐌹𐍃 𐍅𐌰𐌹𐍂𐌸𐌹𐌸, 0 𐌲𐍂𐌹𐌳𐌴𐌹𐍃 𐍃𐌰𐌹𐌻𐍃𐌹𐌿𐍃 𐌿𐌽𐌳𐌰𐍂 𐌸𐍂𐌿𐌺𐌴𐌹𐌽𐌰𐌹 𐍃𐍄𐌰𐌿𐌼𐌰𐌱𐌰𐌻𐌻𐌿𐌲𐌰𐌹 𐌸𐍂𐍉𐌸𐌹𐌻𐌴𐌹𐌺𐌰𐌹 𐌹𐍃𐍄; 𐌷𐌴𐌹𐍄𐌰𐌼𐌹𐍄𐌰𐌸𐍃, 𐌰𐍄 𐌸𐌹𐌶𐌰𐌹𐌴𐌹 𐍅𐌰𐍄𐍉 𐍃𐌹𐌿𐌸𐌴𐌹𐌸, 100 𐌲𐍂𐌹𐌳𐌴𐌹𐍃 𐍃𐌰𐌹𐌻𐍃𐌹𐌿𐍃 𐌰𐍄 𐌸𐍂𐌿𐌺𐌴𐌹𐌽𐌰𐌹 𐍃𐍄𐌰𐌿𐌼𐌰𐌱𐌰𐌻𐌻𐌿𐌲𐌰𐌹 𐌸𐍂𐍉𐌸𐌹𐌻𐌴𐌹𐌺𐌰𐌹 𐌹𐍃𐍄. 𐌹𐍄𐌰 𐌰𐌹𐌽𐌰𐌷𐍉 𐌰𐌱𐌽𐌹 𐌹𐍃𐍄, 𐌸𐌰𐍄𐌴𐌹 𐌼𐌰𐌹𐌶𐍉 𐍅𐌰𐌹𐍂𐌸𐌰𐌹, 𐌸𐌰𐌽 𐍆𐍂𐌹𐌿𐍃𐌰𐌹.

𐍈𐌰𐌻𐌴𐌹𐌺𐌹𐌸𐌰 𐌰𐌹𐌽𐍆𐌰𐌻𐌸𐌰 𐌰𐌺𐌴𐌹 𐌰𐌹𐌽𐌰𐌷𐌰 𐌾𐌰𐌷 𐍅𐌿𐌻𐌸𐍂𐌰𐌹𐍃 𐌰𐍆 𐍅𐌰𐍄𐌹𐌽 𐌹𐍃𐍄, 𐌸𐌰𐍄𐌴𐌹 𐍃𐌺𐌰𐍀 𐍆𐌰𐍃𐍄𐌿 𐌹𐍃 𐌰𐌽𐌰 𐌸𐌰𐌼𐌼𐌰 𐍆𐌻𐍉𐌳𐌿𐌲𐌹𐌽 𐍃𐌺𐌰𐍀𐌰 𐍆𐌻𐌹𐌿𐍄𐌹𐌸. 𐍃𐍉 𐍆𐌰𐍃𐍄𐌾𐍉 𐍆𐌰𐌶𐌰 𐌼𐌹𐌽𐍃 𐌸𐌴𐌹𐌷𐍄𐌰 𐍅𐌰𐍄𐌹𐌽 𐍆𐌻𐍉𐌳𐌿𐌲𐌰𐌼𐌼𐌰 𐌹𐌽 𐍂𐌿𐌼𐌰𐌻𐌴𐌹𐍃𐌴𐌹𐌽𐍃 𐌸𐌹𐌶𐌴 𐍃𐍅𐌹𐌽𐌸𐌰𐌽𐌴 𐍅𐌰𐍄𐌰𐌱𐌽𐌾𐌰𐌷𐌻𐌰𐌲𐌺𐌴 𐌹𐍃𐍄, 𐌸𐌰𐌹𐌴𐌹 𐌸𐌰𐍄𐌰𐌹𐌽𐌴𐌹 𐌰𐍄 𐌷𐌴𐌹𐍄𐌰𐌼𐌹𐍄𐌰𐌸𐌿𐌼 𐌻𐌴𐌲𐌰𐌹𐌼 𐍃𐌺𐌰𐍀𐌰𐌽𐍉𐍃 𐍃𐌹𐌽𐌳. 𐌳𐌿𐌸𐌴 𐍅𐌰𐍄𐍉 𐌳𐌹𐌿𐍀𐌰𐍄𐌰 𐍆𐌻𐍉𐌳𐌿𐌲 𐌱𐌹𐌻𐌴𐌹𐌱𐌰𐌽𐌳, 𐍅𐌰𐍂𐌼𐍉𐌶𐍉 𐌸𐌹𐌶𐌰𐌹 𐌴𐌹𐍃𐌰𐌲𐍉𐌽 𐌿𐍆𐌰𐍂𐍃𐌹𐌿𐌽𐌰𐌹, 𐌾𐌰𐌷 𐌻𐌹𐌱𐌰𐌹𐌽𐌹𐌲𐌰𐍃𐌺𐌰𐍆𐍄𐌴𐌹𐍃 𐍆𐌻𐍉𐌳𐌿𐌲𐍉𐍃 (𐌸𐍉𐍃 𐌰𐌹𐌽𐌰𐌷𐍉𐌽𐍃 𐌻𐌹𐌱𐌰𐌽𐌳𐌴𐌹𐌽𐍃 𐌻𐌹𐌱𐌰𐌹𐌽𐌹𐌲𐌰𐍃𐌺𐌰𐍆𐍄𐌴𐌹𐍃 𐌰𐌽𐌰 𐌰𐌹𐍂𐌸𐌰𐌹) 𐌹𐌽 𐌳𐌿𐍃𐍄𐌰𐍃𐍃𐌹𐌼 𐌴𐌹𐍃𐌰𐌲𐌰𐌹𐌼 𐌿𐍆𐌰𐍂𐌻𐌹𐌱𐌰𐌽 𐌼𐌰𐌲𐌿𐌽.

𐍅𐌰𐍄𐍉 𐌺𐌰𐌿𐍂𐌿, 𐍃𐌴𐌼𐌹𐌺𐌰𐌿𐍂𐌿 𐌾𐌰𐌷 𐌿𐍆𐌰𐍂𐌺𐌰𐌿𐍂𐌿

𐌿𐍄𐌰𐌽𐌰 𐍅𐌰𐍄𐌹𐌽𐍃 𐌸𐍂𐍉𐌸𐌹𐌻𐌴𐌹𐌺𐌹𐍃 𐌾𐌰𐌷 𐍃𐍅𐌰𐌽𐌰𐌼𐌽𐌹𐌳𐌰 «𐍅𐌰𐍄𐍉 𐍃𐌴𐌼𐌹𐌺𐌰𐌿𐍂𐌿», «𐍅𐌰𐍄𐍉 𐌺𐌰𐌿𐍂𐌿» (𐌰𐌽𐌸𐌰𐍂𐌰𐌱𐌽𐌾𐌰𐍃𐌿𐍂𐌹𐌳𐌰) 𐌾𐌰𐌷 «𐍅𐌰𐍄𐍉 𐌿𐍆𐌰𐍂𐌺𐌰𐌿𐍂𐌿» (𐌸𐍂𐌹𐌳𐌾𐌰𐌱𐌽𐌾𐌰𐍃𐌿𐍂𐌹𐌳𐌰). 𐌰𐍄 𐍅𐌰𐍄𐌹𐌽 𐌺𐌰𐌿𐍂𐌾𐌰𐌼𐌼𐌰 𐌾𐌰𐌷 𐌿𐍆𐌰𐍂𐌺𐌰𐌿𐍂𐌾𐌰𐌼𐌼𐌰 𐍃𐍉 𐌸𐍂𐍉𐌸𐌹𐌻𐌴𐌹𐌺𐍉 𐍅𐌰𐍄𐌰𐌱𐌽𐌾𐌰𐍆𐍂𐌿𐌼𐌰𐌹𐌽𐌹𐌸𐌰 𐌹𐌱𐌽𐌰𐍃𐍄𐌰𐌳𐌹𐌼 𐌺𐌰𐌿𐍂𐌾𐌰𐌹𐌼 𐌿𐍆𐍃𐌰𐍄𐌹𐌳𐌰 𐌹𐍃𐍄: 𐌰𐌽𐌸𐌰𐍂𐌰𐌱𐌽𐌾𐌰 𐌾𐌰𐌷 𐌸𐍂𐌹𐌳𐌾𐌰𐌱𐌽𐌾𐌰. 𐌰𐍄 𐍅𐌰𐍄𐌹𐌽 𐍃𐌴𐌼𐌹𐌺𐌰𐌿𐍂𐌾𐌰𐌼𐌼𐌰 𐌰𐌹𐌽𐌰 𐍅𐌰𐍄𐌰𐌱𐌽𐌾𐌰𐍆𐍂𐌿𐌼𐌰𐌹𐌽𐌹𐌸𐌰 𐌰𐌽𐌸𐌰𐍂𐌰𐌱𐌽𐌾𐌰 𐌿𐍆𐍃𐌰𐍄𐌹𐌳𐌰 𐌹𐍃𐍄.

𐍅𐌰𐍄𐍉 𐌺𐌰𐌿𐍂𐌿 𐌼𐌹𐍃𐍃𐌰𐌻𐌴𐌹𐌺 𐍆𐍂𐌰𐌼 𐍅𐌰𐍄𐌹𐌽 𐌸𐍂𐍉𐌸𐌹𐌻𐌴𐌹𐌺𐌰𐌼𐌼𐌰 𐌹𐌽 𐌼𐌹𐌸𐌱𐌿𐌽𐌳𐌾𐍉𐌼 𐌰𐌱𐌽𐌾𐌰𐌻𐌴𐌹𐍃𐌹𐌻𐌴𐌹𐌺𐌰𐌹𐌼 𐌾𐌰𐌷 𐍅𐌹𐍃𐍄𐌴𐌹𐌲𐌰𐌹𐌼 𐌹𐍃𐍄. 𐌳. 𐍆. 𐌾𐌰𐌷 𐍃𐌼𐌰𐌹𐌻𐍄𐌰𐌹𐌽𐌹𐍃𐍄𐌹𐌺 𐌷𐌰𐌿𐌷𐌹𐌶𐌰𐌽 𐌾𐌰𐌷 𐍃𐌹𐌿𐌸𐌰𐌹𐌽𐌹𐍃𐍄𐌹𐌺 𐌷𐌰𐌿𐌷𐌹𐌶𐌰𐌽 𐌷𐌰𐌱𐌰𐌹𐌸 𐌾𐌰𐌷 𐌸𐌴𐌹𐌷𐍄𐍉𐌶𐍉 𐌹𐍃𐍄. 𐌹𐌽 𐌼𐌰𐌶𐌰𐌲𐌰𐍃𐌺𐌰𐌹𐌳𐌴𐌹𐌽𐌰𐌹𐍃 𐌼𐌹𐌺𐌹𐌻𐌰𐌹𐌶𐍉𐍃 𐌼𐌹𐌸 𐍆𐍂𐌿𐌼𐌰𐌱𐌽𐌾𐌰 𐌾𐌰𐌷 𐌰𐌽𐌸𐌰𐍂𐌰𐌱𐌽𐌾𐌰 𐌾𐌰𐌷 𐌸𐍂𐌹𐌳𐌾𐌰𐌱𐌽𐌾𐌰 (𐌸𐍉𐌴𐌹 𐌼𐌰𐌶𐍉𐍃 𐍄𐍅𐌹𐍆𐌰𐌻𐌸𐍉𐍃 𐌾𐌰𐌷 𐌸𐍂𐌹𐍆𐌰𐌻𐌸𐍉𐍃 𐌷𐌰𐌱𐌰𐌽𐌳), 𐍃𐍉 𐌷𐍂𐍉𐌶𐌴𐌹𐌽𐌴𐌹𐌲𐍉 𐌹𐌱𐌽𐌰𐍃𐍄𐌰𐌸𐌹𐌻𐌴𐌹𐌺𐍉 𐍅𐌰𐌹𐍂𐌺𐌴𐌹𐌽𐍃 𐍆𐌹𐌻𐌿 𐍈𐌰𐍃𐍃𐌰 𐌹𐍃𐍄. 𐌰𐍆𐌰𐍂 𐌿𐍆𐍃𐌰𐍄𐌴𐌹𐌽𐌰𐌹 𐌰𐍆 𐍅𐌰𐍄𐌹𐌽 𐌸𐍂𐍉𐌸𐌹𐌻𐌴𐌹𐌺𐌰𐌼𐌼𐌰 𐍆𐌰𐌿𐍂 𐌰𐌱𐌽𐌾𐌰 𐌹𐌱𐌽𐌰𐌲𐌰𐍅𐌰𐌹𐌷𐍄𐌾𐌰𐌽𐌳𐌰𐍄𐌰𐍅𐌴𐌹𐌽𐌴𐌹𐍃 𐌹𐌽𐌼𐌰𐌹𐌳𐌾𐌰𐌽𐌳, 𐌸𐌰𐍄𐌴𐌹 𐌳. 𐍆. 𐌳𐌿 𐍆𐌿𐌻𐌲𐌰𐌹𐌽𐌹𐌼 𐍃𐌺𐌰𐌸𐌿𐌻𐌰𐌹𐌼 𐌹𐌽 𐌸𐌰𐌼𐌼𐌰 𐌼𐌰𐌽𐌽𐌹𐍃𐌺𐌹𐌽 𐌻𐌴𐌹𐌺𐌰 𐌻𐌰𐌹𐌳𐌾𐌰𐌽 𐌼𐌰𐌲.

𐌻𐌹𐌱𐌰𐌹𐌽𐌹𐌻𐌴𐌹𐍃𐌴𐌹

𐍀𐌰𐌽𐌽𐌹𐌲𐌲𐍃 𐌰𐌽𐌰 𐍅𐌰𐍄𐌹𐌽 𐌹𐌽𐌺𐌰𐌿𐍀𐍀𐌰

𐍅𐌰𐍄𐍉 𐌸𐌰𐍄𐌰 𐌸𐌰𐌿𐍂𐍆𐍄𐍉𐍃𐍄𐍉 𐌰𐌱𐌽𐌹 𐍆𐌰𐌿𐍂 𐌰𐌻𐌻𐍉𐍃 𐌻𐌹𐌱𐌰𐌽𐌳𐌴𐌹𐌽𐍃 𐌲𐌰𐍃𐌺𐌰𐍆𐍄𐌹𐌽𐍃 𐌹𐍃𐍄, 𐌿𐌽𐍄𐌴 𐌼𐌰𐌽𐌰𐌲𐍉𐍃 𐍈𐌰𐌻𐌴𐌹𐌺𐌹𐌸𐍉𐍃 𐍃𐌹𐌻𐌳𐍉𐍃 𐌷𐌰𐌱𐌰𐌹𐌸, 𐌸𐍉𐌶𐌴𐌹 𐍅𐌿𐌻𐌸𐍂𐌰𐌹𐍃 𐍆𐌰𐌿𐍂 𐌻𐌹𐌱𐌰𐌹𐌽 𐍃𐌹𐌽𐌳. 𐌻𐌰𐌿𐍃𐌴𐌹𐌽𐌹𐌼𐌹𐌳𐌹 𐌲𐍉𐌳𐌰𐍄𐌰 𐌹𐍃𐍄 𐌾𐌰𐌷 𐌿𐍆𐌰𐍂𐍃𐌹𐌿𐌽𐌹𐍃𐍀𐌰𐌽𐌽𐌴𐌹𐌽 𐍃𐍅𐌹𐌽𐌸𐌰 𐌷𐌰𐌱𐌰𐌹𐌸. 𐍅𐌰𐍄𐍉 𐍆𐍂𐌹𐍃𐌺𐌰𐍄𐌰 𐌸𐌴𐌹𐌷𐍄𐍉𐍃𐍄 𐌰𐍄 4 °C 𐌹𐍃𐍄; 𐌿𐍃𐌲𐌰𐌱𐍂𐌰𐌹𐌳𐌹𐌸 𐍅𐌰𐌹𐍂𐌸𐌹𐌸, 𐌸𐌰𐌽 𐍆𐍂𐌹𐌿𐍃𐌴𐌹𐌸 𐌰𐌹𐌸𐌸𐌰𐌿 𐍃𐌹𐌺 𐌲𐌰𐌷𐌴𐌹𐍄𐌴𐌹𐌸. 𐍅𐌹𐍃𐌰𐌽𐌳𐌹𐌽 𐌼𐌹𐌸𐌰𐌹𐌽𐌹𐌸𐌰 𐍃𐍄𐌰𐌽𐌳𐌰𐌽𐌳𐌴𐌹 𐌹𐌽 𐌸𐌰𐌼𐌼𐌰 𐍃𐍄𐌰𐌿𐌼𐌰𐌱𐌰𐌻𐌻𐌰𐌿 𐌿𐌽𐍃𐌰𐍂𐌰𐌼𐌼𐌰, 𐌷𐌻𐌰𐌿𐍄𐌹𐌲𐌰𐍅𐌰𐌿𐍂𐌺𐌹 𐍅𐌿𐌻𐌸𐍂𐌰𐌹𐍃 𐍃𐍅𐌴 𐍆𐍂𐌰𐍃𐌻𐌰𐌽𐌳𐌴𐌹𐌽𐌹𐌼𐌹𐌳𐌹 𐌰𐍆 𐌿𐍃𐍃𐌺𐌰𐌹𐌽𐌴𐌹𐌽𐌰𐌹 𐌿𐍆𐍂𐌰𐌿𐌳𐌰𐌹 𐍃𐍀𐌹𐌻𐍉𐌸, 𐌿𐌽𐍄𐌴 𐍅𐌰𐍄𐍉 𐌷𐌴𐌹𐍄𐌴𐌹𐌽 𐌺𐌹𐌽𐌸𐌴𐌹𐌲𐌰 𐌼𐌹𐍃𐍃𐌰𐌻𐌴𐌹𐌺𐌰 𐌷𐌰𐌱𐌰𐌹𐌸, 𐍃𐌴𐌹 𐌻𐌿𐍆𐍄𐌿𐌻𐌰𐌲 𐌱𐌹 𐌸𐌰𐌼𐌼𐌰 𐌰𐌻𐌻𐌰𐌼𐌼𐌰 𐍆𐌰𐌹𐍂𐍈𐌰𐌿 𐌲𐌰𐍃𐍄𐍉𐌳𐌴𐌹𐌸.

𐍅𐌰𐍄𐍉 𐌻𐌰𐌿𐍃𐌴𐌹𐌽𐌹𐌼𐌹𐌳𐌹 𐍅𐌿𐌻𐌸𐍂𐌰𐌹𐍃 𐌹𐍃𐍄 𐌾𐌰𐌷 𐌼𐌰𐌽𐌰𐌲𐍉𐍃 𐌺𐌹𐌽𐌸𐌹𐌽𐍃 𐌰𐌱𐌽𐌾𐌴 𐍃𐍅𐌴 𐍃𐌰𐌻𐍄𐌰 𐌾𐌰𐌷 𐍃𐌿𐌺𐌺𐌰𐍂𐌰𐌽𐍃 𐌳𐌹𐍃𐌻𐌰𐌿𐍃𐌴𐌹𐌸. 𐌰𐌱𐌽𐌾𐌰𐌹𐌽𐌷𐌰𐌻𐌳𐌰𐌱𐌽𐌾𐌰 𐍃𐌴𐌹𐌽𐌰, 𐌸𐍉𐌴𐌹 𐌰𐌱𐌽𐌾𐌰𐌹𐌽𐌼𐌰𐌹𐌳𐌴𐌹𐌽𐌰𐌹𐍃 𐌱𐌹𐍆𐌻𐌰𐌿𐌷𐍄𐌰𐌽𐌰𐌹𐌶𐍉𐍃 𐌷𐌹𐌻𐍀𐌰𐌽𐌳, 𐌲𐌰𐌰𐌹𐌽𐍆𐌰𐌻𐌸𐌴𐌹𐌸. 𐌹𐌸 𐍃𐌿𐌼𐌰 𐌰𐌱𐌽𐌾𐌰 𐌽𐌹 𐌱𐌻𐌰𐌽𐌳𐌰𐌽𐌳 𐍅𐌰𐌹𐌻𐌰 𐌼𐌹𐌸 𐍅𐌰𐍄𐌹𐌽, 𐌹𐌽𐌻𐌿𐌺𐌰𐌽𐌳𐌹𐌽 𐌰𐌻𐌴𐍅𐌰 𐌾𐌰𐌷 𐌰𐌱𐌽𐌾𐌰 𐍅𐌰𐍄𐌰𐍆𐌰𐌿𐍂𐌷𐍄𐌰. 𐌷𐌹𐌽𐌸𐍉𐌽𐍃 𐍆𐌰𐍄𐌹𐌻𐌹𐍃𐌺𐍉𐍃 𐌸𐌹𐌶𐍉𐍃 𐍈𐌰𐌻𐌴𐌹𐌺𐌹𐌸𐍉𐍃 𐌱𐍂𐌿𐌺𐌾𐌰𐌽𐌳 𐌳𐌿 𐍅𐌰𐍂𐌰𐌱𐌰 𐍃𐍄𐌹𐌿𐍂𐌾𐌰𐌽 𐌼𐌹𐌸𐍄𐌰𐍅𐌴𐌹𐌽𐌹𐌽𐍃 𐌼𐌹𐌸 𐌹𐌽𐌷𐌰𐌻𐌳𐌰𐌼 𐍃𐌴𐌹𐌽𐌰𐌹𐌼 𐌾𐌰𐌷 𐌿𐍄𐌰𐌽𐌰𐌼 𐌰𐌱𐌽𐌾𐌰𐌼. 𐌸𐌰𐍄𐌰 𐌻𐌴𐌹𐍄𐌹𐌻 𐍆𐍂𐌰𐌼 𐌿𐍆𐌰𐍂𐍃𐌹𐌿𐌽𐌹𐍃𐍀𐌰𐌽𐌽𐌴𐌹𐌽𐌰𐌹 𐌰𐍆 𐍅𐌰𐍄𐌹𐌽 𐌲𐌰𐌰𐌹𐌽𐍆𐌰𐌻𐌸𐌹𐌸 𐌹𐍃𐍄.

𐍅𐌰𐍄𐌰𐌳𐍂𐌿𐍀𐌰𐌽𐍃 𐍃𐍄𐌰𐌽𐌳𐌰𐌽𐌳𐌰𐌽𐍃 𐌹𐌽 𐌸𐌹𐌶𐍉𐍃 𐍃𐍅𐌹𐌽𐌸𐍉𐌽𐍃 𐌿𐍆𐌰𐍂𐍃𐌹𐌿𐌽𐌹𐍃𐍀𐌰𐌽𐌽𐌴𐌹𐌽𐌰𐌹𐍃 𐌰𐍆 𐍅𐌰𐍄𐌹𐌽 𐍃𐌹𐌽𐌳. 𐌼𐌰𐌽𐌽𐌰 𐌸𐌰𐍄𐌰 𐍃𐌰𐌹𐍈𐌰𐌽 𐌼𐌰𐌲, 𐌸𐌰𐌽 𐌻𐌴𐌹𐍄𐌹𐌻 𐍅𐌰𐍄𐌹𐌽𐍃 𐌰𐌽𐌰 𐌿𐍆𐌰𐍂𐍃𐌹𐌿𐌽 𐌿𐌽𐌻𐌰𐌿𐍃𐌹𐌱𐌴𐍂𐌾𐌰 𐍃𐍅𐌴 𐌲𐌻𐌰𐍃 𐍃𐌰𐍄𐌹𐌸 𐍅𐌰𐌹𐍂𐌸𐌰𐌹. 𐌸𐌰𐍄𐌰 𐍅𐌰𐍄𐍉 𐍃𐌹𐌺 𐌹𐌽 𐌳𐍂𐌿𐍀𐌰𐌼 𐌲𐌰𐌻𐌹𐍃𐌰𐌹𐌽𐌰. 𐍃𐍉 𐍈𐌰𐌻𐌴𐌹𐌺𐌹𐌸𐌰 𐌸𐌰𐌿𐍂𐍆𐍄𐌰 𐍆𐌰𐌿𐍂 𐍆𐍅𐍄𐌰𐌸𐌰𐌹𐍂𐌷𐌰𐌽𐌸𐌴𐌹𐌽 𐌹𐍃𐍄.

𐌻𐌰𐌽𐌳𐌰𐌻𐌴𐌹𐍃𐌴𐌹

𐌰𐌽𐌰 𐌿𐍆𐌰𐍂𐍃𐌹𐌿𐌽𐌰𐌹 𐌸𐌹𐌶𐍉𐍃 𐌰𐌹𐍂𐌸𐍉𐍃 𐍅𐌰𐍄𐌰𐌼𐌰𐌶𐍉𐍃, 𐍃𐍅𐌴 𐌱𐌰𐌺𐌴𐌹𐍃 𐌾𐌰𐌷 𐌰𐍈𐍉𐍃, 𐍃𐌹𐌺 𐌳𐌰𐌻𐌰𐌸 𐌲𐌰𐌻𐌹𐍃𐌰𐌽𐌳, 𐌾𐌰𐌷 𐍃𐍄𐌰𐌽𐌳𐌰𐌽𐌳𐍉 𐍅𐌰𐍄𐍉 𐌰𐍄 𐍃𐌿𐌼𐌰𐌼𐌼𐌰 𐌱𐌹𐌲𐍂𐌿𐌽𐌳𐌰𐌿, 𐍃𐍅𐌴 𐌼𐌰𐍂𐌹𐍃𐌰𐌹𐍅𐌹𐌼, 𐌼𐌰𐍂𐌴𐌹𐌼 𐌾𐌰𐌷 𐌷𐌰𐌱𐌰𐌼.

𐌿𐌽𐍄𐌴 𐍅𐌰𐍄𐍉 𐌸𐌰𐌿𐍂𐍆𐍄 𐍆𐌰𐌿𐍂 𐌼𐌰𐌽𐍃, 𐌳𐌹𐌿𐌶𐌰- 𐌾𐌰𐌷 𐍆𐍅𐍄𐌰𐌻𐌹𐌱𐌰𐌹𐌽 𐌹𐍃𐍄, 𐌳𐌹𐍃𐍃𐌰𐍄𐌹𐌱𐌴𐍂𐌹𐌸𐌰 𐌹𐍃 𐌼𐌹𐌺𐌹𐌻𐌰 𐍅𐌿𐌻𐌸𐍂 𐌲𐌰𐍃𐌰𐌻𐌾𐌰𐌻𐌴𐌹𐌺𐌰 𐌾𐌰𐌷 𐌸𐌹𐌿𐌳𐌹𐌽𐌰𐍃𐍃𐌿𐍃𐌰𐌺𐌹𐍃𐌺𐌰 𐌷𐌰𐌱𐌰𐌹𐌸. 𐍃𐍉 𐌳𐌿𐌱𐌹𐌰𐌿𐌺𐌰𐌽𐍉 𐌻𐌰𐌽𐌳𐌰𐌺𐌰𐍂𐍄𐌰 𐌸𐌰𐍄𐌰 𐌸𐌰𐌹𐍂𐌷 𐌻𐌰𐌽𐌳𐌰 𐍂𐌰𐌿𐌳𐌰 𐌰𐍄𐌰𐌿𐌲𐌴𐌹𐌸, 𐌸𐍉𐌴𐌹 𐌾𐌴𐍂𐌰 𐍈𐌰𐌼𐌼𐌴𐌷 𐌼𐌹𐌽𐍃 𐌰𐌹𐌲𐌿𐌽 500 $m^3$ 𐌰𐍆 𐍅𐌰𐍄𐌹𐌽 𐌷𐍂𐌰𐌹𐌽𐌾𐌰𐌼𐌼𐌰 𐍆𐌰𐌿𐍂 𐌹𐌽𐌱𐌰𐌿𐌰𐌽𐌳𐍃 𐍈𐌰𐌽𐌶𐌿𐌷. 𐌲𐌹𐌻𐍅 𐌳𐌹𐍃𐍃𐌰𐍄𐌹𐌱𐌴𐍂𐌹𐌸𐌰 𐌼𐌹𐌸 500 𐌾𐌰𐌷 1700 $m^3$ 𐌰𐍄𐌰𐌿𐌲𐌴𐌹𐌸. 𐌿𐌽𐍄𐌴 𐌼𐌰𐌽𐌰𐌲𐍉𐍃 𐌰𐍈𐍉𐍃, 𐌸𐍉𐌶𐌴𐌹 𐍅𐌿𐌻𐌸𐍂𐌰𐌹𐍃 𐍆𐌰𐌿𐍂 𐍅𐌰𐍄𐌰𐌲𐌰𐍂𐌴𐌸 𐍃𐌹𐌽𐌳 (𐌳. 𐍆. 𐌾𐌰𐌿𐍂𐌳𐌰𐌽𐌿𐍃 𐌾𐌰𐌷 𐌺𐍉𐌻𐍉𐍂𐌰𐌳𐍉) 𐌻𐌰𐌽𐌳𐌰𐌼𐌰𐍂𐌺𐍉𐍃 𐌸𐌰𐌹𐍂𐌷𐍆𐌰𐍂𐌰𐌽𐌳𐌴, 𐌼𐌹𐌸𐍃𐌻𐌰𐌷𐌴𐌹𐍃 𐌸𐌰𐌹𐍂𐌷𐍂𐌴𐌹𐌺𐌹𐍃𐌺𐌰𐌹 𐌱𐌹 𐌳𐍂𐌰𐌲𐌺𐌴𐌹𐌽𐌹𐍅𐌰𐍄𐍉 𐌼𐌰𐌷𐍄𐌴𐌹𐌲𐌰𐌹 𐍃𐌹𐌽𐌳.

𐌻𐌰𐌽𐌳𐌰 𐌼𐌹𐌸 𐍅𐌰𐌽𐌰 𐌰𐍆 𐍅𐌰𐍄𐌹𐌽 𐌳𐍂𐌹𐌲𐌺𐌰𐌱𐌴𐍂𐌾𐌰𐌼𐌼𐌰

𐌳𐌹𐍃𐍃𐌰𐍄𐌹𐌱𐌴𐍂𐌹𐌸𐌰

𐌳𐌹𐍃𐍃𐌰𐍄𐌹𐌱𐌴𐍂𐌹𐌸𐌰 𐌰𐍄𐌲𐌰𐌲𐌲 𐌳𐌿 𐍅𐌰𐍄𐌹𐌽 𐍆𐍂𐌰𐌼 𐌲𐌰𐍄𐌹𐌼𐍂𐌴𐌹𐌽𐌹𐍅𐌰𐌿𐍂𐍃𐍄𐍅𐌰𐌼 𐌲𐌰𐌼𐌰𐌹𐌽𐌰𐌲𐌰𐌹𐌼, 𐌺𐌰𐌿𐍀𐍉𐌽𐌹𐌲𐌰𐍄𐌴𐍅𐌴𐌹𐌽𐌹𐌼, 𐌲𐌰𐌼𐌰𐌹𐌽𐌳𐌿𐌸𐌹𐌿𐍃𐌰𐌹𐍅𐌴𐌹𐌽𐌹𐌼 𐌰𐌹𐌸𐌸𐌰𐌿 𐍆𐍂𐌰𐌼 𐌰𐌹𐌽𐌰𐌷𐌰𐌻𐌹𐌲𐌲𐌰𐌼 𐌹𐍃𐍄, 𐌸𐍂𐍉𐌸𐌹𐌻𐌴𐌹𐌺𐍉 𐌸𐌰𐌹𐍂𐌷 𐌲𐌰𐍄𐌴𐍅𐌴𐌹𐌽 𐌰𐍆 𐍀𐌿𐌼𐍀𐍉𐌼 𐌾𐌰𐌷 𐍀𐌴𐌹𐍀𐍉𐌼. 𐌹𐌽𐍅𐌰𐍄𐌽𐌴𐌹𐌽𐍃 𐍃𐌿𐌽𐌳𐍂𐌰𐌱𐌰 𐌷𐌿𐌲𐌰𐌳𐌰.

𐌹𐌽 2010 𐌱𐌹 85% 𐌰𐍆 𐌲𐌰𐌸𐌹𐌿𐌳𐌴𐌹𐌽𐌰𐌹 𐌱𐌹 𐌸𐌰𐌼𐌼𐌰 𐍆𐌰𐌹𐍂𐍈𐌰𐌿 (6,74 𐍄𐍅𐌹𐌺𐌹𐌻𐌿𐌽𐌳𐌾𐍉𐍃) 𐌰𐍄𐌲𐌰𐌲𐌲 𐌳𐌿 𐍄𐌰𐍀𐍀𐌰𐍅𐌰𐍄𐌹𐌽 𐌰𐌹𐌸𐌸𐌰𐌿 𐍅𐌰𐍄𐌹𐌽 𐌲𐌰𐌱𐌰𐍄𐌹𐌸 𐌷𐌰𐌱𐌰𐌹𐌳𐌴𐌳𐌿𐌽 𐌸𐌰𐌹𐍂𐌷 𐌱𐍂𐌿𐌽𐌽𐌰𐌽𐍃 𐌰𐌻𐌾𐌰𐌽𐍃 𐌲𐌰𐍂𐌳𐌰, 𐌹𐌽𐌻𐌿𐌺𐌰𐌽𐌳𐌰𐌽𐍃 𐍅𐌰𐍄𐌰𐌱𐍂𐌿𐌽𐌽𐌰𐌽𐍃. 𐌹𐌸 𐌱𐌹 14% (884 𐌼𐌹𐌺𐌹𐌻𐌿𐌽𐌳𐌾𐍉𐍃 𐌼𐌰𐌽𐍃) 𐌽𐌹 𐌷𐌰𐌱𐌰𐌹𐌳𐌴𐌳𐌿𐌽 𐌰𐍄𐌲𐌰𐌲𐌲 𐌳𐌿 𐍅𐌰𐍄𐌰𐌱𐍂𐌿𐌽𐌽𐌹𐌽 𐌲𐌰𐌱𐌰𐍄𐌹𐌳𐌰𐌼𐌼𐌰 𐌾𐌰𐌷 𐌱𐍂𐌿𐌽𐌽𐌰𐌽𐌴 𐌿𐌽𐍅𐌰𐍂𐌳𐍉𐌳𐌰𐌹𐌶𐌴, 𐍃𐌺𐌰𐌿𐍂𐌸𐌴, 𐌼𐌰𐍂𐌹𐍃𐌰𐌹𐍅𐌴 𐌰𐌹𐌸𐌸𐌰𐌿 𐌰𐌹𐍈𐍉 𐍆𐌰𐌿𐍂 𐍅𐌰𐍄𐌰𐌸𐌰𐌿𐍂𐍆𐍄𐌹𐌽𐍃 𐌱𐍂𐌿𐌺𐌾𐌰𐌽 𐌸𐌰𐌿𐍂𐍆𐍄𐌴𐌳𐌿𐌽.

𐍅𐌰𐍄𐌰𐌻𐌰𐍃𐌴𐌹𐌽𐌹𐌱𐌹𐌻𐌿𐌺𐌾𐍉

𐍆𐌰𐌹𐍂𐍈𐌿𐌻𐌰𐌽𐌳𐌰𐌺𐌰𐍂𐍄𐌰 𐍆𐌰𐌿𐍂 𐍅𐌰𐍄𐌰𐌻𐌰𐍃𐌴𐌹𐌽𐌹𐌱𐌹𐌻𐌿𐌺𐌾𐍉𐌽𐍃. 𐍆𐌰𐌹𐍂𐍈𐌿𐌳𐌰𐌹𐌻𐌴𐌹𐍃 𐌲𐍂𐌴𐍅𐍉𐍃 𐌱𐌹𐌻𐌿𐌺𐌾𐍉𐌽𐍃 𐌹𐌽𐍆𐌻𐌰𐌿𐌰𐌽𐌳𐌴𐌹𐌽𐍃 𐌽𐌹 𐌷𐌻𐌰𐌲𐌺𐍉𐌳𐍉𐍃 𐌳𐌿 𐌼𐌰𐍂𐌴𐌹𐌽 𐌰𐌹𐌸𐌸𐌰𐌿 𐌷𐌰𐌱𐌰 𐌰𐍄𐌰𐌿𐌲𐌴𐌹𐌸

𐍅𐌰𐍄𐌰𐌻𐌰𐍃𐌴𐌹𐌽𐌹𐌱𐌹𐌻𐌿𐌺𐌾𐍉 𐌰𐌹𐌸𐌸𐌰𐌿 𐌱𐌿𐌻𐌻𐌰 𐌲𐌰𐍅𐌹 𐌿𐍆𐌰𐍂𐌰𐌹𐍂𐌸𐌹𐍃𐌺𐌰𐍄𐌰 𐌾𐌰𐌷 𐌿𐍆𐌰𐌹𐍂𐌸𐌹𐍃𐌺𐌰𐍄𐌰 𐌹𐍃𐍄, 𐌿𐍃 𐌸𐌰𐌹𐌴𐌹 𐍅𐌰𐍄𐍉 𐌳𐌿 𐌰𐌹𐍈𐍉𐌼 𐌳𐌿 𐌼𐌰𐍂𐌹𐍃𐌰𐌹𐍅𐌹𐌼, 𐌷𐌰𐌱𐌰 𐌰𐌹𐌸𐌸𐌰𐌿 𐌻𐌴𐍅𐌹𐍃𐌺𐍉 𐌱𐌿𐌻𐌻𐌹𐌽 𐌰𐌻𐌾𐌰𐌼𐌼𐌰 𐍆𐌻𐌰𐌿𐌰𐌹𐌸. 𐍅𐌰𐍄𐌰𐌰𐍆𐍆𐌻𐌰𐌿𐌴𐌹𐌽𐌹𐌳𐌹𐍃𐌳𐌰𐌹𐌻𐌴𐌹𐌽𐍃 𐌸𐍉 𐍃𐍅𐌴 𐍆𐌰𐌹𐍂𐌲𐌿𐌽𐌾𐌰𐌷𐌻𐌰𐌲𐌺𐌴𐌹𐍃 𐌼𐌰𐌹𐍂𐍉𐌸. 𐌰𐌹𐍂𐌸𐌰𐌳𐌰𐌹𐌻𐌴𐌹𐍃 𐌾𐌰𐌷 𐌻𐌰𐌽𐌳𐌰 𐌿𐍆𐍄𐌰 𐌰𐍆𐌰𐍂 𐌱𐌿𐌻𐌻𐌰𐌼 𐌰𐍆𐌳𐌰𐌹𐌻𐌹𐌳𐌰 𐍃𐌹𐌽𐌳 𐌾𐌰𐌷 𐍅𐌰𐍄𐍉 𐌹𐌶𐌴 𐌹𐌽 𐌻𐌰𐌹𐌳𐌰𐌼 𐌼𐌹𐍃𐍃𐌰𐌻𐌴𐌹𐌺𐌰𐌹𐌼 𐍆𐌻𐌰𐌿𐌹𐌸.

𐌺𐍂𐌿𐍀𐍀𐍉𐌽𐍃 𐌾𐌰𐌷 𐌽𐌰𐌼𐌽𐌰 𐍅𐌰𐍄𐌹𐌽𐍃

𐍅𐌰𐍄𐍉 𐍃𐌹𐌺 𐌹𐌽 𐌳𐌿𐍃𐍄𐌰𐍃𐍃𐌰𐌹 𐍆𐌰𐍃𐍄𐌾𐌰𐌹, 𐍆𐌻𐍉𐌳𐌿𐌲𐌰𐌹 𐌾𐌰𐌷 𐌲𐌰𐍃𐌹𐍃𐌺𐌰𐌹 𐍆𐌰𐌿𐍂𐌰𐌲𐌰𐍃𐌰𐍄𐌾𐌰𐌽 𐌼𐌰𐌲, 𐍅𐌹𐍃𐌰𐌽𐌳𐍉 𐌰𐌹𐌽 𐌰𐍆 𐍆𐌰𐍅𐌰𐌽𐌰 𐌰𐌱𐌽𐌴, 𐌸𐍉𐌴𐌹 𐌹𐌽 𐌰𐌻𐌻𐌰𐌹𐌼 𐌹𐌶𐌴 𐌹𐌽 𐍃𐌺𐌰𐍀𐌰 𐍅𐌹𐍃𐍄𐌹𐌺𐌿𐌽𐌳𐌰𐌼𐌼𐌰 𐌱𐌹𐌲𐌹𐍄𐌰𐌽𐌰 𐍅𐌹𐍃𐌰𐌽 𐌼𐌰𐌲𐌿𐌽. 𐍅𐌰𐍄𐍉 𐌸𐍂𐌹𐌾𐌰 𐍃𐌺𐌰𐍀𐌰 𐌼𐌹𐍃𐍃𐌰𐌻𐌴𐌹𐌺𐌰 𐌰𐌽𐌰 𐌰𐌹𐍂𐌸𐌰𐌹 𐌹𐌽𐌱𐍂𐌿𐍃𐍄𐌴𐌹𐌸: 𐍃𐍅𐌴 𐍅𐌰𐍄𐌰𐍃𐍄𐌰𐌿𐌼𐍃, 𐌿𐍃𐍄𐌰𐌿𐌾𐌰𐌽𐌳𐌹𐌽 𐌳𐌰𐌹𐌻 𐌻𐌿𐍆𐍄𐌿𐌱𐌰𐌻𐌻𐌰𐌿𐍃, 𐍃𐍅𐌴 𐌼𐌰𐍂𐌹𐍅𐌰𐍄𐍉, 𐌰𐌿𐍆𐍄𐍉 𐍃𐍅𐌴 𐍃𐌺𐌰𐍀 𐌰𐍆 𐌴𐌹𐍃𐌰𐌱𐌰𐌹𐍂𐌲𐌰𐌹 𐌹𐌽 𐌷𐌰𐌱𐌰𐌼, 𐍃𐍅𐌴 𐌾𐌹𐌺𐌹𐌻𐍉𐍃 𐌾𐌰𐌷 𐌰𐍈𐍉𐍃 𐌹𐌽 𐍆𐌰𐌹𐍂𐌲𐌿𐌽𐌾𐌰𐌼, 𐌾𐌰𐌷 𐌹𐌽 𐌸𐌰𐌼𐌼𐌰 𐌿𐍆𐌰𐌹𐍂𐌸𐌹𐍃𐌺𐌹𐌽 𐍅𐌰𐍄𐌰𐌱𐌰𐌹𐍂𐌷𐍄𐍂𐌰 𐌹𐌽 𐍃𐌺𐌰𐍀𐌰 𐍆𐌻𐍉𐌳𐌿𐌲𐌰𐌼𐌼𐌰.

𐍅𐌰𐍄𐍉 𐌼𐌰𐌽𐌰𐌲𐌰 𐌰𐌱𐌽𐌾𐌰 𐌳𐌹𐍃𐌻𐌰𐌿𐍃𐌾𐌰𐌽 𐌼𐌰𐌲, 𐌹𐌽 𐌸𐌹𐌶𐌴𐌹 𐌼𐌰𐌽𐌽𐌰 𐌿𐍆𐍄𐌰 𐌹𐍄𐌰 𐍃𐍅𐌴 𐌰𐌻𐌰𐍆𐌰𐌹𐍂𐍈𐌿𐌻𐌰𐌿𐍃𐌴𐌹𐌽𐌹𐌼𐌹𐌳𐌹 𐌰𐌽𐌰𐍃𐍀𐌹𐌻𐍉𐌸. 𐍃𐍅𐌴 𐍆𐌿𐌻𐌲𐌰𐌹𐌽𐍃 𐌰𐍆 𐌷𐌻𐌰𐌿𐍄𐌹𐌲𐌰𐍅𐌰𐌿𐍂𐌺𐌾𐌰 𐌿𐌽𐌰𐌽𐌳𐌱𐌰𐌹𐍂𐌰𐌱𐌴𐍂𐌾𐌰𐌼𐌼𐌰 𐌹𐍃 𐍆𐌰𐌿𐍂 𐌻𐌹𐌱𐌰𐌹𐌽 𐌼𐌰𐌽𐌽𐌰, 𐌹𐌽 𐌼𐌰𐌽𐌰𐌲𐌰𐌹𐌼 𐌳𐌹𐌿𐌶𐌰𐌼 𐌰𐌻𐌾𐌰𐌹𐌼, 𐌺𐍉𐌽𐌹𐌸𐌰 𐌰𐌽𐌳𐍅𐌰𐌽𐌳 𐌴𐌹 𐌳𐍂𐌹𐌲𐌺𐌰𐌱𐌴𐍂𐌹𐌸𐌰 𐌰𐍆 𐍅𐌰𐍄𐌹𐌽 𐍆𐌰𐌿𐍂𐌰𐌱𐌹𐍅𐌰𐌹𐍂𐌸𐍉𐌽 𐌼𐌰𐌷𐍄𐌴𐌳𐌹.